"Славiя" Мазыр 0 - 2 "Дынама" Брэст

У гэтым годзе атрымалася так, што «Славіі» было наканавана ўдзельнічаць у стартавым і заключным матчах брэсцкага турніру «Winter Cup-2014». І калі перад першай гульнёй звычайнаму гледачу наогул было невядома, чаго можна чакаць ад абноўленай палескай каманды, то фінальная сустрэча міні-спаборніцтва ўсё ж такі ўжо выклікала некаторыя спадзяванні. Напрыклад, вельмі хацелася першы раз у новым сезоне адчуць смак перамогі, бо два папярэднія матчы скончыліся для падапечных Юрыя Пунтуса, як мы ведаем, з нулявым вынікам.

Так што жаданне займець запаветных тры ачкі было даволі сур’ёзным. Тым больш, што было магчыма паўплываць на размеркаванне прызавых месцаў: у выпадку вікторыі мазырчукоў ці нават нічыёй ў гульні, якая закрывала турнір, пераможцам зімовага кубка станавіўся б магілёўскі «Дняпро», які атрымаў перамогі над «Славіяй» і «Гарадзеяй», але саступіў «Дынама». Якое, у сваю чаргу, яшчэ не адчула горычы паразы, звёўшы да нічыёй матч супраць «Гарадзеі» і, як згадвалася вышэй, абыграўшы магілёўскіх гасцей.

Хоць гэтыя фактары ўсё ж такі ніяк не адмянялі агульны характар ​​таварыскага спаборніцтвы. Менавіта таму ў першым тайме ў мазырчукоў на полі з'явіўся даволі эксперыментальны, скажам так, склад. У ліку першых адзінаццаці быў і, да прыкладу, Раман Варабей, жаданне якога праявіць сябе стала прыкметна з першых жа хвілін сустрэчы. Малады хаў прымаў актыўны ўдзел у стварэнні мазырскіх нападаў, пару разоў выводзіў на ўдарную пазіцыю цэнтрфорварда Дзяніса Лапцева, які, на жаль, не здолеў скарыстацца момантамі. Ды і наогул нікому з стану мазырчукоў не ўдалося распячатаць вароты сваіх паўднёва-заходніх апанентаў: Нячаеў ў першым тайме і Дудар ў другім кожны раз, калі мяч ішоў у створ, аказваліся на месцы.

Наогул гульня праходзіла больш у цэнтры поля, дзе была вялікая колькасць барацьбы, хоць часамі здараліся і даволі вострыя моманты, праўда, часцей каля брамы Максіма Кажадуба. У першай палове гульні гаспадарам турніру атрымалася двойчы правесці рэзультатыўныя атакі, пасля якіх маладому галкіперу «Славіі» даводзілася капітуляваць. Абодва мячы аўтарства Андрэя Шамрука можна, дарэчы, пабачыць тут. Таксама ўлюбёнец берасцейскай і мазырскай публікі Раман Васілюк ў другім тайме меў пару забойных момантаў, каб зрабіць кошт больш буйным, аднак геройства Кажадуба, які яшчэ ў мінулым годзе абараняў вароты мазырскага дубля, не дазволіла Раману адзначыцца. Хоць гэта не перашкодзіла апошняму стаць прызнаным лепшым гульцам у складзе «Дынама» на дадзеным турніры.

Карацей кажучы, па выніку сустрэчы на ​​табло так і засталіся гарэць першатаймавыя 2:0 на карысць «Дынама», што і зрабіла каманду з горада над Бугам пераможцамі зімовага турніру. Акрамя галоўнага прыза турніру ў стан «Дынама» адправілася і ўзнагарода лепшаму галеадору - у дадзенай намінацыі першынстваваў Андрэй Шамрук, які забіў, як і гарадзеец Дзяніс Яхно, 2 мячы (і, дарэчы, таксама абодва за адзін матч). «Славія» ж заняла апошняе месца, не атрымаўшы ніводнага ачка. Аднак для каманды, якая толькі за 8 дзён да пачатку спаборніцтва выйшла з адпачынку, гэта не можа лічыцца ўжо вельмі адмоўным вынікам.

Мы яшчэ падвядзем вынікі ўсяго турніру і пагаворым пра ўсе гэтыя справы з яго ўдзельнікамі са стану «Славіі». Так што заставайцеся з намі і падтрымлівайце сваю мясцовую каманду!

Славія:

1 тайм: Кажадуб - Малчанаў, Канапацкі, Раеўскі, Харытончык - Шчагрыковіч, Варабей, Хаміцэвіч - Слесарчук, Лапцеў, Герман.

2 тайм (выходзілі): Шляга, Ахраменка Любаеў, Галяк, Дадамян, Каленік, Кліміхін, Паўлавец, Радчанка, Аль-Маджыд.

Дынама:

Нячаеў (Дудар, 46) - Семянюк, Жаўнераў, Ніколаў, Татарэвіч - Юдзянкоў, Прамудраў - Мацюхевіч (Дзямкоў, 70), Нарожнік (Салавей, 46), Шамрук - Васілюк (к) (Мулькевіч, 60).